أنا شرطي المرور... الأحمق

المكان: سوق البيادر، مش كتير صحبة معه، لكن ذهبت لشراء بعض الأغراض من إحدى المحلات في الشارع الرئيسي، وعندما وصلت بالسيارة، وجدت أماكن فارغة للإصطفاف، بس ماعرفتش الإصطفاف بالطول أوبالعرض؟ والسيارت المتواجدة مصطفة بالشكلين! ولا إشارة ولا أي لوحة إرشاد أو معلومات تدل على أي شيء! فقررت الإصطفاف بالعرض تماشياً مع السيارة اللي وقفت بجانبها. المهم الله وكيلكم دخلت ع المحل دقيقتين، وطلعت وإذ بورقة مخالفة على سيارتي...


إه! كيف ليش؟ طب وين الشرطي اللي خالف؟ إختفى زي الشبح!... دوّر يمين شمال لغاية ما لقيته، وإليكم الحوار:

أنا: يعطيك العافية، لو سمحت ممكن أعرف سبب مخالفتي
شرطي المرور: لأنك صافف بالعرض
أنا: يعني لازم أصف بالطول! هممممم وكيف راح أعرف؟
الشرطي: هذا القانون
أنا: وين القانون؟ دلني عليه الله إيخليك؟ فهمني أكتر
الشرطي: في قارمة بتحكيلك، روح دور عليها.
أنا: موافق بس معلش تيجي إتدوَر معي (يا غبي"حكيتها بيني وبين حالي")
وصرنا إندوًر وإنلطش، وإتفضلوا وين طلعت القارمة (إضغط على الصورة للتكبير)...


نعم نعم... مخسوفة ع الأرض وراء كل شيء، وليس فقط ذلك، بل موجّهة للجهة الخلفية أيضاً

أنا متابعاً للحوار: شو رأيك؟
الشرطي: ما إلي دخل، وإذا مش عاجبك روح إشتكي علي
أنا: يا عمًي اللي إعملته مش مزبوط، وهاي المخالفة ظلم ومش صحيحة، كان لازم بدل ما إتخالفني، تروح تحكي مع أمانة عمّان تيجي إتصلح الوضع بعدين إلك الحق إتخالف زي مابدك! أنا برفض هاي المخالفة، لأنه إنت بحد ذاتك الآن مخالف للقوانين، وبطالبك إنك تلغيها
الشرطي: ولا راح أعملك إشي
أنا: طب سؤال لو سمحت، ليش خالفتني وما خالفت السيارة اللي جنبي؟
الشرطي: والله ما شفتها، بس شفت سيارتك!
أنا: نعم؟؟؟؟؟

وإليكم المشهد كاملاً (سيارتي إلى اليسار مشار إليها بالسهم الأحمر، وعلى يميني السيارة الثانية بنفس حالتي، لكنها طبعاً نمرة قطرية، وعلى ما أعتقد لا يوجد قانون مخالفة للسيارات الأجنبية. السهم في الأعلى يشير إلى العامود الذي يحمل في اسفله الإشارة المخفية) (إضغط على الصورة للتكبير)...


المهم بعد مرور أكثر من نص ساعة إنبح صوتي ولا أخذت حق ولا باطل مع هالشرطي اللي كان بيحكي معي بمنتهى العجرفة والجبروت، وختمت حواري معه بقولي: أنا متأسف اللي حاورتك، ضيعتلي وقتي ع الفاضي

أين العدل؟ أين أمانة عمَان؟ أين القوانين الصارمة؟ وهل يوجد فعلاً مواصفات لتعيين شرطي المرور؟ آه يا للأسف، تذكرت عندما قمت بتسجيل أغنية لمسلسل كرتون الأطفال (طارق وشيرين) من حوالي 4 سنين، كانت تقول: أنا شرطي المرور أنظم المسير، وأحفظ النظام في الشارع الكبير، أكون كل حين كالحارس الأمين، أستعمل اليديين أستعمل الصفارة، لأرشد المشاة وسائق السيارة....

بلا حارس أمين بلا هم، لو بعرف إنه هالشرطي حيكون ظالم كان ما عمري سجلت هالأغنية... يلا معلش هي هشك بشك شوي وإتسجلت ع السريع، بس بسمعكم إياها ( ألحان قاسم صابونجي، ولا أذكر كلمات من) وأنا شرطي المرور