كاس التيوس

الخبّيزه ساكته، ما حكت ولا كلمه بكل فترة كاس العالم، والآن أقول ألف الحمدلله على إنتهاء لعبة وحدّت الشعب ونخوته وشهامته على مواقف واضحه "أخيراً" وذلك لدعم كمّن قرد راكدين زي المجانين على حشيش أخضر ورا كره مسخّمه، و واحد واقف مش إمخليها إتفوت! الشي الوحيد اللي كان يفرحني هي الشوارع الفاضيه خلال وقت المباراة واللتي تدل على العقول اللي "مش فاضيه" زيها، لأنه بهالوقت كنت بقضّي كل مشاويري بعيد عن قرف صيف عمّان، وبدون ما أسوق مع شياطين الله على الأرض، خساره راح أفتقد هالأيام

بس علشان أحكي اللي إلي واللي علي، والله إكتير إنبسطنا بهالجمعات الحلوة في عمّان و بمليون ألف شاشة لملمت هالناس حوليها... يا سلاااام... زي أيام سوبر ستار، و ستار أكاديمي، ودعارة الوادي مع هيفا ... شو في أحلى من هيك؟ بلا حروب بلا هم... شو غزّه و أموات ودم و حكي فاضي، شو العراق و أهلها وغيره وغيراته، أي خلينا إنفرفش لمدة كمن شهر، وخلي الواحد يشتغل على نمو عقله و تغذية ضميره إشوي... كل هادا مهم جدا لمستقبلنا وحضارتنا، آه والله

يا رب إحفظ إيطاليا من كل مكروه... فلتحيا إيطاليا ولتحيا الحكومه الإيطالية والسباغيتي والبيتزا، ويخليلنا كاس العالم يارب علشان يوحدّنا كمان مره بعد 4 سنين، لأنه أكيد حنكون إطوّرنا أكتر وبلادنا إتحررت وعقولنا إتنورّت وضمائرنا مرتاحه، وإنشالله إتضّل كوكاكولا، مشروب ولاد عمنا، الراعي الرسمي لهالحدث، وصحتين وعافيه، ودقي يا مزيكا